فلسفة حمامه ......


http://album.m3com.com.sa/showImage/...98167/size/500



أعجبتني الصورة .. واختلطت مشاعري .. ما بين ضحكه على طفل .. وما بين هيبة الحرم ..والشوق إليه ... وما بين جمال المنظر



تخيلت نفسي جالس في الساحه استريح من الدنيا .. وبجانبي مرت حمامه




وقفت




تنظر إلي




تنتظر إني أعطيها أكل




مديت لها يدي .. أعطيها حب .. انثره لها هنا وهناك ... لين تعودت علي .. و قررت تقترب أكثر





*



*



*



ودي اكلمها ... ودي اسألها .. بعدين تبسمت على الخيالات إلي عايش فيها



قلت آه من التعب بصوت عالي .. إلا وردت علي



قالت:سلامتك من الآه



قلت:سبحان الله ... حمامه تتكلم ... وكمان تعرفني



قالت إيه .. كم مرة أكلتني ... ونثرت لي الحبوب بيديك



سألتها ... وكيف تذكريني من بين ملايين البشر ؟



قالت :إحنا ماهو مثل بعضكم .. إحنا ما ننسى الجميل .. ولا ننكر المعروف .. ونحفظ ديننا أحسن منكم



قلت : انتى احسن مننا ؟؟؟



قالت : طبعا .. نسبح الله بكرة وأصيلا .. ويكفي يوم كان نبيك صلى الله عليه وسلم في الغار .. حميناه .. وجلسنا على الغار .. ووضعنا البيض وفديناه .. لكن انتم ... ايش سويتم ؟؟؟



بضائع الدنمارك تملأ بيوتكم والله المستعان



وربك ... لو جتنا حبوب من الدنمارك لنتركها .. حتى لو متنا من الجوع




رحت سألتها لاجل أتجنب الإحراج .. ياحمامه كيف حالك ؟



قالت: بخير
قلت: كيف الدنيا معاك .. مبسوطه .. والا متضايقه .. مرتاحه .. والا تعبانه ؟؟؟



قالت : عجيب أمرك ...وهل هناك أحد من خلق الله ماهو قانع بما قسم الله له و ماهو مبسوط ؟؟؟


قلت: كثير والله يا حمامه



قالت: الحمدلله الذي عافانا مما ابتلاكم



قلت: الدنيا كلها تعب .. جري وراء الرزق وجري وراء العمل والمظاهر ... وكأننا حانعيش على طول



قالت: باعلمك شئ .. ولا تقول [فلسفة من حمامه )



قلت: هاتى ما عندك يا حمامه .. ولو كانت فلسفة مو مشكله .. الكل صار يتفلسف اليوم .. كل واحد والا وحده أصبح خبير .. كل واحد اصبح مفتي وعالم وإداري كبير .. وهو مفتاح اصلاح كل الأمور .. ماجات عليك



سمعيني .. علميني .. يمكن منك استفيد




قالت: شفت هذى الساحه .. ملياااااانه حبوب .. ما آخذ إلا كفايتي .. بس إللي يشبعني .. ماني مثلكم



ولا فينا وحده مثلكم



كلنا جماعه وحده .. نأكل سوا .. نطير سوا .. ما تفرقنا مثل بعض المسلمين



نجمع ... نحسد ... نحقد




طيب أجمع لمين .. لنفسي ... طيب طالما انا شبعت .. أيش رايحه استفيد .. ليه ما اترك الباقي لحمام الحرم ... ليه بعض المسلمين .. ما يتركوا شئ للمسلمين




بالله عليك .. السنا خيرا من بعضكم ؟؟؟



قلت: اجمعي لعيالك



قالت: عيالي أعلمهم الطيران .. أعلمهم كيف يأكلوا .. لكن ... ما اجمع لهم أكثر من كفايتهم .. ما أشيل الحبوب المنثوره لكل الحمام



أنا أخاف من ربي .. ماني مثل بعض البشر .. أخاف أتحاسب عن باقي الحمام



قلت: طيب .. يا حمامه .. اجمعي لهم و لو ... من باب إنهم يرتاحوا من بعدك



قالت: سبحان الله في طبع البشر .. مافي احد ما يتعب يامايسترو
( لقد خلقنا الإنسان في كبد )
.. كيف تبغي لهم الراحة .. كيف تطلب لنفسك الراحه قبل ما تحط رجلك في الجنة ؟؟؟




قلت: نفسي اسألك سؤال بس مستحي



قالت: اتفضل



قلت: ارجوك ... لا تعتبريه سخريه او معايبة على خلق الله



قالت: ما اعتقد إنك انت إلي تعايب على خلق الله ولا تسخر من أحد .. وانت عارف إن أكرمكم عند الله أتقاكم



قلت: ما تمنيتى يوم إنك تغيري هذا اللون الرمادي .. ما تمنيتى إن يكون لك الوان زاهية .. تفتخري بيها على باقي الحمام .. ما جريتى يوم خلف المظاهر ؟؟؟



قالت: والله عيب عليك تسألني هذا السؤال .. تقدر تغير ملابسك



قلت: كيف يعني



قالت: يعني لو جا احد المسلمين للعمره..وكان لابس ثوب ... والا حتى بنطلون



قلت: ما ينفع .. ولو كان حتى لابس بدله أرماني ... لازم إحرام



قالت: .. أنا كذا مثلهم .. ريشي ولوني دليل هويتي .. فخري وإعتزازي .. والمسلم إحرامه دليل هويته هنا .. أول ما اشوفه أعرف إنه مسلم .. إنه جاء يبغى رب البيت



أول ما أشوف المسلمة وحجابها وعبايتها .. اعرف إنها ملتزمة وتخاف ربها وتحفظ عرض أبوها




انا ريشي ومكاني هم هويتي .. لكن انت كل حياتك ... هي هويتك




أنا يوم القيامة ابعث بريشي وأكلي إللي اكلته في الساحه وخايفه من الحساب .. وانت بكل حياتك وما فيها ايضا



قلت: لا تفهميني غلط ياحمامه .. انا قصدي من باب التغيير والزينة



قالت: صدقني أنا أجمل مما تتخيل .. تبغيني اتشبه بحمام ... غير حمام الحرم !!!



افرض إني سويت مثل بعض البشر



لبست ثوب غيري .. تكلمت بكلام غيري .. خلعت ثوبي وثوب اهلي




افرض إني جيت بكره بريش وردي



صدقني مهما كنت حلوه .. ما حاكون مثل باقي الحمام




حاكون غريبة ولو كنت بين ربعي واهلي



حاطيح من عيون كل الحمام .. ولو كنت احلاهم في عين نفسي ... حتى إنت ... رغم حنانك على الحمام .. حتسأل .. إيش وقف هذه الحمامه الغريبة بين حمام الحرم .. يمكن حتى ترفض تأكلني .. تقول حمام الحرم أولى

قلت: والله كلامك صحيح ... ولو إنه من حمامه



قالت : احس من كلامك ان بعض المسلمين يتنكروا لإسلامهم .. ممكن يتشبهوا بالكفار .. بملابسهم .. بكلامهم .. بأفعالهم



هل عندكم هذا الكلام !!!!




علمني ... علمني أنا ما أخرج من الساحه ... ولا أروح اسواق ... ولا اشوف قنوات




بغيت أقول إيوه لكن خفت .. تتشمت بي الحمامه .. خفت أكذب ... خاصة إني في ساحة الحرم .. رحت سكت ... سويت نفسي مشغول بالنظر للبيت الحرام



قلت لها عشان أخرج بعيد عن الموضوع




صراحه عجبني كلامك .. ايش رايك ترجعي معي لبيتي.. ولك علي اتكفل بكل شئ .. أكلك وشربك




قالت: اعوذ بالله



قلت: ليش تتعوذي بالله مني .. شايفتني بخيل ؟؟؟



قالت: الحين .. أنا متوكله على الله في كل شئ .. تبغاني اتوكل عليك !!!



حاتعب .. حامرض .. حاصير مثلكم



قلت: مين قال هذا الكلام ياحمامه .. حتأكلي أجمل أكل ... وراح أأكلك بيدي ... وأحطك في قفص من ذهب



قالت: لو رحت معاك .. بانشغل بك .. متى تيجي .. متى تأكلني .. متى تشربني .. متى تخليني اشوف الشمس



هذا مكاني .. هنا اذكر الله واسبح .. كيف أعرض عنه لجل هدف ثاني .. كيف ؟؟؟




( ومن أعرض عن ذكري فإن له معيشة ضنكا )



آسفه .. شوف لك حمامه ثانية .. حمامه تشتهي الذهب .. تقضي عمرها تحلم وتحلم .. لكن ... لا تنسى تقص لها ريشها .. طالما هي سجينة .. ولو كانت في قفص من ذهب .. ولو كانت سجينة أحلامها ... حيبقى الناس يقولوا .. ما أجمل القفص .. مسكينة الحمامه .. خلوها تطير



الحين انت من الصبح تسألني .. ودي أسألك سؤال واحد




قلت: اسألي .. وأيش تبغين تعرفين .. عنواني .. والا أحلامي



قالت: لا .. باسألك عن دمعة في عيونك



قلت: غريبة .. كنت أظنها خافية على الناس



قالت: اضحك الله سنك .. وهل أنا .. ناس .. أنا حمامه




قلت: تعبت والله يا رمادية الريش .. العمر يجرى .. والرحلة طويلة .. والزاد قليل .. والأماني عظيمه ...
.. والقبر يخوف ... والحساب شديد .. والجنة غاليه .. والنار تقول هل من مزيد .. والرب فعال لما يريد ... وكل ما أقول أديت إللي علي .. اكتشف إني لسه بعيييييد .. والفتن .. كل يوم تزيد




ما بين خوفي على نفسي وخوفي على الناس .. لابد من دمعة هنا ... ودمعة هناك .. دمعة على نفسي .. ودمعة عليهم



قالت : اسمعني ... كل يوم أشوف حمام يجي .. وحمام يروح .. وحمام يموت .. لين صارت عندنا قناعة .. هي قناعة عند كل الحمام



قلت: قولي ياحمامه



قالت: شوف يا حزين القلب .. نحن بني الحمام الرمادي .. أعزنا الله بجواره فلا نبيع جواره أبدا .. ولو تحطني في قفص ذهب .. وأنتم بني الإسلام .. لو ابتغيتم العزة بغير دينكم ... ليذلكم الله لكل خلقه .. ثم لا تجدوا من دونه وليا ولا نصيرا



سلم على أمة محمد




بلغهم إن حمام الحرم مشتاق لهم




الحرم مشتاق لهم




الكعبة مشتاقة لهم




خلهم يتوجهوا لها .. ولو .. بقلوبهم وقت الصلاة





بلغهم إن ربهم غفور رحيم .. مشتاق لتوبة العصاة منهم





ما بين واسع رحمته .. وعظيم عزته .. فليستغفروا




اسألهم




أما آن للبعض منهم أن يعود ... أما آن بعد




ألم يعلموا أنه ليس لهم إلا الله




علمهم إن كل شئ في الدنيا يحن لذكر الله .. حتى الحجر




مالهم غيره في الدنيا والآخرة




علمهم إننا مثل بعض الدعاة




بعضنا عليهم ينوح




ثم اقرأ عليهم



( ألم يأن للذين أمنوا أن تخشع قلوبهم لذكر الله )
( ألم يأن للذين أمنوا أن تخشع قلوبهم لذكر الله )
( ألم يأن للذين أمنوا أن تخشع قلوبهم لذكر الله )





اشوفك على خير .. الآن يرفعوا الآذان





ينادوا حي على الصلاة





حي الفلاح





وأحب ارفرف وقتها حول المآذن